 |
|
|
ЧУДОТВОРНАЯ ИКОНА БОЖИЕЙ МАТЕРИ ВСЕХ СКОРБЯЩИХ РАДОСТИ
(с монетами)
находящаяся в часовне Скорбящей Божией Матери, в г.
С.-Петербурге, на Стеклянном, за Александро-Невской лаврой,
по Шлиссельбургскому проспекту,
И
ОПИСАНИЕ ЧУДЕС ОТ НЕЕ
с приложением точных снимков с иконы, храма и часовни, а также тропарей и молитв
Протоиерей С. С. НАРКЕВИЧ
С.-ПЕТЕРБУРГ, 1993 г.
Печатается по изданию протоиерея С. С. Наркевича,
разрешенному к печати протоиереем Философом Орнатским
3 ноября 1905 г.
|
|
|
ЧАСТЬ ШЕСТАЯ:
ТРОПАРИ
Божией Матери Всех Скорбящих Радости
1.
К Богородице прилежно ныне притецем, грешнии и смирении, и припадем, в покаянии зовуще из глубины души: Владычице! Помози, на ны милосердовавши, потщися, погибаем от множества прегрешений, не отврати Твоя рабы тщы: Тя бо и едину надежду имамы.
2.
Не умолчим никогда, Богородице, силы Твоя глаголати, недостойнии: аще бо Ты не бы предстояла молящи, кто бы нас избавил oт толиких бед; кто же бы сохранил до ныне свободны: не отступим. Владычице, от Тебе: Твоя бо рабы спасаеши присно от всяких лютых.
Всех скорбящих радосте и обидимых заступнице, алчущих питательнице, странных утешение, обуреваемых пристанище, больных посещение, немощных покров и заступнице, жезл старости, Мати Бога Вышняго, Ты еси Пречистая, потщися, молимся, спастися рабом Твоим.
КОНДАК
Не имамы иныя помощи, не имамы иныя надежды, разве Тебе, Владычице, Ты нам помози: на Тебе надеемся и Тобою хвалимся: Твои бо есмы раби, да не постыдимся.
МОЛИТВЫ
ко Пресвятой Богородице
1.
О, Пресвятая Владычице и Богородице, высшая херувим и честнейшая серафим. Богоизбранная Отроковице, Всех Скорбящих Радосте! Подаждь утешение и нам в скорби сущим: разве бо Тебе иного прибежища и помощи не имамы. Ты едина еси радости нашея ходатаице, и яко Матерь Божия и Мати милосердия, предстоящи у престола Пресвятыя Троицы, можеши нам помощи: никтоже бо притекаяй к Тебе посрамлен отходит. Услыши убо и нас ныне в день скорби пред Твоею иконою припадающих, и со слезами Тебе молящихся: отжени от нас належащия на нас скорби и печали в сей временней жизни, не лишены же ны сотвори Твоим всесильным ходатайством и вечныя, нескончаемыя радости в Царствии Сына Твоего и Бога нашего. Аминь.
2.
Надежно ненадеемых, сило беспомощных, пристанище обуреваемых, покрове напастствуемых, заступление обидимых, одеяние нагих, исцеление больных, Радосте Всех Скорбящих, преблагословенная и пренепорочная Дево, Мати Преблагословенного Бога! К Тебе усердно прибегаем, к Твоему покрову вседушно преклоняем колена, Владычице! Не призри плача и слез, о Утехо плачущих! Аще и ужасает нас недостоинство наше по грехом нашим, но дерзновение подает нам цельбоносный сей святый Твой образ, от него же благодать Твою и силу, яко неисчерпаемое море, источаеши всем, с верою к нему притекающим: слепым прозрение, глухим слышание, недугующим врачевание, скорбящим утешение, всем во всякой беде сущим вспоможение и спасение. Тем же и мы, грешнии, дерзая прибегохом и взирая на святый Твой образ, яко Тебе Самой сущей и присно с нами пребывающей, приносим смиренныя моления наша. Ты, всемилостивая Госпоже Владычице Богородице, веси всякую нашу беду, веси всякую нашу скорбь. Не презри убо нашего моления, не возгнушайся нас, грешных; вемы бо яко вся можеши, елика волиши, о преблагая наша Надеждо и Утешение! От юности нашея к Тебе привержени есмы, не остави нас и не отступи от нас ныне и присно и во веки веков. Аминь.
3.
Царице моя преблагая, надеждо моя Богородице, приятелище сирым, и странным предстательнице, скорбящым Радосте, обидимым покровительнице зриши мою беду, зриши мою скорбь: помози ми, яко немощну, окорми мя, яко странна. Обиду мою веси, разреши ту, яко волиши: яко не имам иныя помощи, разве Тебе, ни иныя предстательницы, ни благия утешительницы, токмо Тебе, о Богомати, яко да сохраниши мя и покрыеши во веки веков. Аминь.
4.
О Пресвятая Дево, Мати Господа вышняго, Заступнице и Покровительнице всех, к Тебе прибегающих, Радосте Всех Скорбящих! Призри с высоты святыя Своея на нас грешных, припадающих к чудотворному лику Твоему; услыши наши смиренныя моления и принеси их пред возлюбленного Сына Твоего, Господа нашего Иисуса Христа; умоли Его, да просветит мрачныя души наши светом божественныя благодати Своея, да избавит ны от всякия нужды, скорби и болезни, да ниспошлет нам тихое и мирное житие, здравие телесное и душевное, да успокоит страждущия сердца наши и исцелит раны их, да вразумит ны на добрыя дела, очистит ум наш от помышлений суетных, наставит ны ко исполнению заповедей Своих, избавит от вечныя муки и не лишит Своего небесного Царствия.
О Пресвятая Богородице, Ты "Всех Скорбящих Радосте", услыши и нас скорбных. Ты именуемая — "Утоление печали", утоли и наши печали. Ты — "Купина неопалимая", сохрани мир и всех нас от вредоносных, огненных стрел врага. Ты - "Взыскание погибших", не попусти и нам погибнути в бездне грехов наши. На Тя по Бозе вся наша надежда и упование! Буди нам покровительницею в жизни временней и вечней и ходатаицею пред возлюбленным Сыном Твоим, Господом нашим, Иисусом Христом. Научи ны служити Ему с верою и любовию и благоговейно чтити Тебе, Пресвятая Мати Божия, Преблагословенная Марие! Твоим святым молитвам вручаем себе до скончания дней наших! Аминь.
5.
О Пресвятая Дево, Мати Господа вышних сил, небесе и земли Царице, града и страны нашея всемощная Заступнице, Всех Скорбящих Радосте! Приими молебное пение сие от нас, недостойных раб Твоих, и вознеси моления наша к престолу Бога Сына Твоего, да милостив будет неправдам нашим и пробавит благодать Свою чтущим всечестное имя Твое и с верою и любовию поклоняющимся пречистому, чудотворному образу Твоему. Несмы бо достойни от Него помилованы быти, аще не Ты умилостивиши Его о нас. Владычице, яко вся Тебе от Него возможна суть. Сего ради к Тебе прибегаем, яко несомненней и скорей Заступнице нашей. Всех Скорбящих Радости: услыши нас, молящихся Тебе, осени нас весдержавным покровом Твоим и испроси у Бога, Сына Твоего, здрание и во всем благое поспешение Благочестивейшему Государю нашему и всему царствующему Дому, пастырем нашим ревность и попечение о душах, градоправителем мудрость и силу, начальствующим и судиям правду и нелицеприятие, наставником разум и смиренномудрие, супругам любовь и согласие, чадом послушание, обидимым терпение, обидящим страх Божий, скорбящим благодушие, радующимся воздержание, всем же нам —
дух разума и благочестия, дух милосердия и кротости, дух чистоты и правды. Ей, Госпоже Пресвятая, умилосердися на немощныя люди Твоя! Рассеянныя собери, заблудшия на путь правый настави, старость поддержи, юныя в целомудрии сохрани, младенцы воспитай, сирот и вдовиц защити, и на всех нас милостиво призри. Воздвигни нас из глубины греховныя и просвети сердечныя очи наша к зрению спасения: милостива нам буду зде и тамо — в стране земного пришельствия и на страшном суде Сына Твоего. Преставльшияся же в вере и покаянии от жития сего отцы и братию нашу в вечней жизни со ангелами и со всеми святыми жити сотвори. Ты бо еси. Госпоже, слава небесных и упование земных. Ты по Бозе наша надежда и Заступница всех, с верою к Тебе притекающих. К Тебе убо молимся и Тебе, яко всемогущей Помощнице, сами себе и друг друга, и все житие наше предаем ныне и присно, и во веки веков. Аминь.
6.
О Чудная и Высшая всех тварей. Царице Богородице, небеснаго Царя Христа Бога нашего Мати! Услыши нас грешных и недостойных раб Твоих, в час сей молящихся и припадающих к Тебе со воздыханием и слезами, и со умилением глаголющих: изведи нас от рова страстей. Владычице, избави нас от всякия скорби и печали; огради от всякия напасти и злых клевет и от неправеднаго и лютаго навета вражия. Можеши бо, о Благодатная Матерь наша, не точию от всякого зла сохранити люди Твоя, но и всяким благодеянием снабдити их и спасти: разве бо Тебе иныя предстательницы в бедах и обстояниях и теплыя ходатаицы о нас грешных не имамы к Сыну Твоему, Христу Богу Нашему. Его же умоли. Владычице, да спасеннии Тобою славим и в будущем веце всесвятое имя Сына Твоего и Бога нашего, со Отцем и Святым Духом, ныне и в бесконечные веки. Аминь.
7.
О Пресвятая Дево, Мати Господа, Царице небесе и земли! Вонми многоболезненному воздыханию души нашея, призри с высоты святыя Твоея на нас, с верою и любовию покланяющихся пречистому образу Твоему. Се бо грехми погружаемии и скорбми обуреваемии, взирая на Твой образ, яко живей Ти сущей с нами, приносим смиренныя моления наша. Не имамы бо иныя помощи, иного предстательства и утешения, токмо Тебе, о Мати всех скорбящих и обремененных. Помози нам немощным, утоли скорбь нашу, настави на путь правый нас заблуждающих, уврачуй болезненныя сердца наши, и спаси безнадежных: даруй нам прочее время живота нашего в мире и покаянии проводити, подаждь нам христианскую кончину, и на страшнем суде Сына Твоего явися нам милосердая Заступница, да всегда поем, величаем и славим Тя, яко благую Заступницу рода Христианского, со всеми угодившими Богу. Аминь.
8.
О всемилостивая Госпоже Богородице, небесная Царице, всемощная Заступнице, непостыдное наше упование! Благодарим Тя о всех благодеяниих, российским людям от Тебе бывших, от древле и до днесь от чудотворных икон Твоих явленных. И ныне, Преблагая Владычице, призри на ны грешныя и недостойныя рабы Твоя, яви нам милость Твою и моли Сына Твоего Христа и Бога нашего, о еже избавитися нам от всякого зла и сохранитися царствующим градом, всякому граду и веси, и всей стране нашей от глада, губительства, труса, потопа, огня, меча, нашествия иноплеменник и междоусобныя брани. Испроси Благочестивейшему, Самодержавнейшему, Великому Государю нашему Императору Николаю Александровичу и всему Царствующему Дому благоденственное и мирное житие, здравие, долгоденствие, во всем благое поспешение и спасение. Сохрани и умудри пастырей церкви, еже достойно пасти стадо Христово и право правити слово истины: укрепи Христолюбивое всероссийское воинство, подаждь дух совета и разума военачальником, градоначальником и всем, иже во власти суть: ниспосли святое твое благословение и всем православным христианам, поклоняющимся и молящимся Ти пред цельбоносною Твоею иконою. Буди нам Заступница и ходатаица пред престолом Всевышняго, идеже предстоиши.
К кому убо прибегнем, аще не к Тебе, Владычице; кому принесем слезы и воздыхания, аще не к Тебе, Пресвятая Богородице: не имамы бо иныя помощи, не имамы иныя надежды, разве Тебе, небесная Царице. Под Твой покров притекаем, молитвами Твоими ниспосли нам мир, здравие, земли плодоносие, воздуха благорастворение, избави ны от всяких бед и скорбей, от всяких недугов и болезней, от внезапныя смерти и от всех озлоблений и врагов видимых и невидимых. Вразуми и научи ны, о всемилостивая Заступнице, како безгрешно прейти путь земнаго сего жития: Ты веси немощи наша, веси и согрешения наша, но и веру веси, и упование видиши: даруй же нам исправление греховный жизни и умягчи злая сердца наша. Укрепи в нас правую веру, вложи в сердца наша дух страха Божия, дух благочестия, дух смирения, терпения и любве, в добрых делах преуспеяние: избави же ны от искушений, от пагубных душевредных учений, от неверия, развращения и погибели вечныя. Тебе убо просим, Пречистая Владычице, и припадающе пред святою Твоею иконою, молимся, умилосердися на ны и помилуй ны, в страшный день же суда ходатайством и заступлением Твоим сподоби ны стати одесную Сына Твоего, Христа Бога нашего, ему же подобает всякая слава, честь и поклонение, со безначальным его Отцем, и пресвятым и благим и единосущным его Духом, ныне и присно, и во веки веков. Аминь.
9.
Надеждо всем концем земли, пречистая Дево, Госпоже Богородице, утешение мое! Не гнушайся мене грешнаго, на Твою бо милость уповаю: угаси ми пламень греховный и покаянием ороси иссохшее мое сердце, очисти ум мой от греховных помыслов, приими мольбу от души и сердца со воздыханием приносимую Тебе. Буди о мне ходатаица к Сыну Твоему и Богу, и укроти гнев Его матерними Твоими молитвами; душевныя и телесныя язвы исцели, Госпоже Владычице, утоли болезни души и тела, утиши бурю злых нападений вражеских, отъими бремя грехов моих, и не остави мене до конца погибнути, и печалию сокрушенное сердце мое утеши, да славлю Тя до последнего издыхания моего. Аминь.
10.
Приими, о всеблагословенная и всемощная Госпоже Владычице Богородице Дево, печальныя сия моления, со слезами Тебе ныне приносимыя от нас недостойных рабов Твоих, к Твоему цельбоносному образу пение воссылающих со умилением, яко Тебе самой сущей и прислушающей моления наша и подающей с верою просящим. По коемуждо бо прошению исполнение твориши, скорби облегчаеши, немощным здравие даруеши, расслабленных и недужных исцеляеши, от бесных бесы прогоняеши, обидимыя от бед избавляеши, грешныя прощаеши, прокаженных очищаеши, и малых детей милуеши: еще же, Госпоже Владычице Богородице, от уз и темницы свобождаеши, и всякия многоразличныя страсти врачуеши, вся бо суть возможна ходатайством Твоим к Сыну Твоему, Христу Богу нашему. О, всепетая Мати Пресвятая Богородице! Непрестай молитися о нас недостойных рабех Твоих (имя), славящих Тя и почитающих Тя и поклоняющихся со умилением Пречистому образу Твоему, и надежду имущих невозвратну и веру несумненну к Тебе Приснодеве преславней и непорочней, славящих и чтущих Тя и вопиющих во веки веков. Аминь.
11.
О пресвятая Госпоже Владычице Богородице, приими недостойную молитву нашу, и сохрани нас от навета злых человек и от напрасныя смерти, и даруй нам прежде конца покаяние, на моление наше умилосердися и радость в печали место даруй. И избави нас. Госпоже, от всякия беды и напасти, скорби и печали и от всякаго зла. И сподоби нас грешных рабов Твоих одесную стати во втором пришествии Сына Твоего Христа Бога нашего, и наследники нас быти сподоби Царствия небеснаго и жизни вечныя, со всеми святыми в бесконечныя веки веков. Аминь.
12.
О Пресвятая Госпоже Владычице Богородице! Со страхом, верою и любовию припадающе пред честною иконою Твоею, молим Тя: не отврати лица Твоего от прибегающих к Тебе. Умоли, милосердная Мати, Сына Твоего и Бога нашего. Господа Иисуса Христа, да сохранит мирно страну нашу, да утвердит державу Благочестивейшаго, Самодержавнейшаго, Великаго Государя нашего Императора Николая Александровича, церковь Свою святую да непозыблему соблюдет от неверия, ересей и раскола. Не имамы бо иныя помощи, не имамы иныя надежды, разве Тебе, Пречистая Дево: Ты еси всесильная христиан помощница и заступница. Избави всех с верою Тебе молящихся от падений греховных, от навета злых человек, от всяких искушений, скорбей, бед, и от напрасныя смерти. Даруй нам дух сокрушения, смирение сердца, чистоту помышлений, исправление греховныя жизни и оставление прегрешений, да вси благодарне воспевая величия Твоя, сподобимся небеснаго Царствия и тамо со всеми Святыми прославим пречестное и великолепое имя Отца и Сына и Святаго Духа. Аминь.
13.
О, Владычице преблагословенная, защитнице рода христианскаго, прибежище и спасение притекающих к Тебе! Вем, воистину вем, яко зело согреших, и прогневах, премилостивая Госпоже, Рожденнаго плотию от Тебе Сына Божия: но имам многия образы прежде мене прогневавших Его благоутробие: мытари, блудницы и прочия грешники, им же дадеся прощение грехов их, покаяния ради и исповедания. Тыя убо образы помилованных очесем грешныя души моея представляя и на толикое Божие милосердие онех приемшее взирая, дерзнух и аз грешный прибегнути с покаянием к Твоему благоутробию. О всемилостивая Владычице: да подаси ми руку помощи, и испросиши у Сына Твоего и Бога матерними и святейшими Твоими молитвами тяжким моим грехом прощение. Верую и исповедую, яко Той, Его же родила еси. Сын Твой, есть воистину Христос Сын Бога живаго, судия живых и мертвых, воздаяй комуждо по делом его. Верую же паки и исповедую Тебе быти истинную Богородицу, милосердия источник, утешение плачущих, взыскание погибших, сильную и непрестающую к Богу ходатаицу, зело любящую род христианский, и споручницу покаяния.
Воистину бо несть человеком иныя помощи и покрова, разве Тебе, Госпоже премилостивая, и никтоже уповая на Тя постыдеся когда, и Тобою умоляя Бога никтоже оставлен бысть. Того ради молю Твою неисчетную благость: отверзи двери милосердия Твоего мне заблудшему и падшему в тимение глубины, не возгнушайся мене сквернаго, не презри грешнаго моления моего, не остави мене окаяннаго, яко в погибель злобный враг похитити мя ищет, но умоли о мне рожденнаго от Тебе милосердаго Сына Твоего и Бога, да простит великие мои грехи, и избавит мя от пагубы моея; яко да и аз со всеми получившими прощение воспою и прославлю безмерное милосердие Божие и Твое непостыдное о мне заступление в жизни сей и в нескончаемом веце. Аминь.
14.
К кому возопию. Владычице, к кому прибегну в горести моей, аще не к Тебе, Царице небесная. Кто плач мой и воздыхание мое приимет, аще не Ты пренепорочная, надеждо христиан, и прибежище нам грешным. Кто паче Тебе в нещастиих защитит. Услыши убо стенание мое, и приклони ухо Твое ко мне. Владычице Мати Бога моего, и не презри мя требующаго Твоея помощи, и не отрини мене грешнаго. Вразуми и научи мя, Царице небесная; не отступи от мене раба Твоего, Владычице, за роптание мое; буди Матерь мне и покровительница. Вручаю себе милостивому покрову Твоему, аще токмо восхощеши устроити о мне. Приведи мя грешнаго к тихому безмятежному житию, да плачуся о грехах моих. Увы мне, к кому прибегну повинный аз, токмо к Тебе, упованию и прибежищу грешных, в надежде на неизреченную милость Твою и щедроты, кое ли слово за преступления моя изрещи возмогу к величеству славы Твоея. О, Владычице Царице Небесная, Ты мне Мати и надежда: Ты ми упование и прибежище, покров, заступление и помощь. Царице моя преблагая, и скорая заступнице, покрый Своим ходатайством моя прегрешения,
защити мене от враг видимых и невидимых: умягчи сердца злых человек восстающих на мя. О Мати Господа моего Творца; Ты корень девства, и неувядаемый цвет чистоты. О Богородительнице, Ты подаждь ми помощь немощствующему плотскими страстьми, и болезнующему сердцем: едино бо Твое, и с Тобою Твоего Сына и Бога нашего, имею заступление, и Твоим пречудным заступлением да оправдан буду, и да избавлюся от всякия беды и напасти всесильными Твоими молитвами, всечистая, и непорочная, и преславная Божия Матерь Мария: Радуйся благодатная, радуйся обрадованная, радуйся преблагословенная, Господь с тобою.
15.
О пресвятая Госпоже, Владычице Богородице, вышши еси всех Ангел и Архангел, и всея твари честнейши, помощница еси обидимых, ненадеющихся надеяние, убогих заступление, печальных утешение, алчущих кормительница, нагих одеяние, больных исцеление, грешных спасение, христиан всех поможение и заступление. О всемилостивая Госпоже, Дево Богородице Владычице, милостию Твоею спаси и помилуй Благочестивейшаго, Самодержавнейшаго, Великаго Государя нашего. Императора Николая Александровича и супругу Его Благочестивейшую Государыню Императрицу Александру Феодоровну, матерь Его Благочестивейшую Государыню Императрицу Марию Феодоровну, Наследника Его, Благовернаго Государя Цесаревича и Великаго князя Алексия Николаевича, и весь царствующий дом. Спаси, Госпоже, и помилуй раб твоих Святейший правительствующий Синод, и преосвященныя митрополиты, архиепископы и епископы, и весь священнический и иноческий чин, и благоверных правительствующий синклит, и военачальников, градоначальников и христолюбивое воинство, и доброхоты, и вся православныя Христианы, ризою Твоею честною защити, и умоли.
Госпоже, из Тебе без Семене воплотившагося Христа Бога нашего, да препояшет нас силою Своею свыше на невидимыя и видимыя враги наша. О всемилостивая Госпоже, Владычице Богородице, о воздвигни нас из глубины греховныя, и избави нас от глада, губительства, от труса и потопа, от огня и меча, от нахождения иноплеменных, и междоусобныя брани, и от напрасныя смерти, и от нападения вражия, и от тлетворных ветр, и от смертоносныя язвы, и от всякаго зла. Подаждь, Госпоже, мир и здравие рабом Твоим всем православным Христианом, и просвети им ум и очи сердечныя, еже ко спасению: и сподоби ны грешныя рабы Твоя Царствия Сына Твоего Христа Бога нашего: яко держава Его благословена и препрославлена, со безначальным Его Отцем, и с пресвятым и благим и животворящим Его Духом, ныне и присно и во веки веков. Аминь.
16.
К Тебе пречистой Божией Матери, аз окаянный припадая молюся: веси. Царице, яко беспрестани согрешаю и прогневляю Сына Твоего и Бога моего. И многажды аще каюся, ложь пред Богом обретаюся, и каюся трепеща, да не како поразит мя Господь, и по часе мале паки таяжде творю. Сия ведущи, Владычице моя, пресвятая Богородице, почто не помилуеши, почто не укрепиши мя, и чесо ради не подаси ми всегда благая творити? Веси убо, о Владычице, яко отнюдь имам в ненависти злая моя дела, и всею мыслию люблю закон Бога моего. Но не вем. Госпоже пречистая, откуду яже ненавижду, тая творю, и сей преступаю. Но не попущай. Пресвятая, воли моей совершатися, не подобна бо есть, но да будет во мне воля Сына Твоего и Бога моего, да мя спасет, и вразумит и подаст ми благодать Святаго Духа, дабы аз отныне престал сквернодействовати, и прочее бых пожил в повелениих Сына Твоего, Господа нашего Иисуса Христа, Ему же подобает всякая слава, честь, поклонение и велелепие со безначальным Его Отцем и с пресвятым и благим и животворящим Его Духом, ныне и присно и во веки веков. Аминь.
17.
О Пресвятая Богородице Дево, Владычице, высшая ангел и архангел, и всея твари честнейшая! Услыши нас молящихся Тебе, и яви милость Твою на людех Твоих; моли Сына Своего избавитися нам от всякаго зла, и сохрани царствующий град, и всякий град, и страну верных, и люди благочестно прибегающия и призывающая имя Твое святое, от всякия напасти, губительства, глада, труса, потопа, огня, меча, нашествия иноплеменников, и междоусобныя брани, от всякия болезни, и всякаго обстояния: да ни ранами, ни прещением, ни мором, ни всяким праведным гневом Божиим умалятся раби Твои: но соблюдай, и спасай милостию Своею, Госпоже, за ны молящися, и полезное благорастворение воздуха ко времени плоднаго приношения нам даруй: облегчи, восстави, и помилуй, премилостивая Владычице, Богородице препетая, во всякой беде и нужде сущия. Помяни рабы Твоя, и не презри слез и воздыхания нашего, и обнови нас благостию Своея милости, да со благодарением утешаемся, обретше Тя помощницу. Умилосердися, Госпоже Пречистая, на немощныя люди Твоя, надеждо наша: рассеянныя собери, заблудшия на путь правый настави,отпадшия от благочестивыя отеческия веры паки возврати, старость поддержи, юныя настави, младенцы воспитай, и прослави славящие Тя, изряднее же Церковь Сына Твоего соблюди, и сохрани в долготу дний. О милостивая и премилостивая Царица небесе и земли. Богородице Приснодево!
Ходатайством Твоим помилуй Благочестивейшаго Самодержавнейшаго, Великаго Государя нашего Императора Николая Александровича всея России, и супругу Его благочестивейшую Государыню Императрицу Александру Федоровну и Матерь Его Благочестивейшую Государыню Императрицу Марию Феодоровну, Наследника Его Благовернаго Государя, Цесаревича и Великаго Князя Алексия Николаевича и весь царствующий дом, палату и все воинство Их, и вся православныя Христианы, сохраняющи их под кровом милости Твоея, ризою Твоею честною защити: и моли из Тебе воплощшагося без семени Христа Бога нашего, да препояшет ны свыше силою на вся видимыя и невидимыя враги наша, на иноплеменники и единоплеменники, воюющия на нас и на веру нашу православную. Спаси же и помилуй. Госпоже. Святейший Правительствующий Синод, и преосвященныя митрополиты, архиепископы и епископы православныя, иереи же и диаконы, и весь причет церковный; и вся правоверныя люди, поклоняющияся и молящияся пред честною Твоею иконою.
Призри на всех нас призрением милостиваго Твоего заступления: воздвигни нас из глубины греховныя, и просвети очи сердечныя ко зрению спасения, милостива нам буди зде, и на страшнем суде Сына Твоего о нас умоли, преставльшияся во благочестии от жития сего рабы Твоя, в вечней жизни со ангелы и архангелы, и со всеми святыми причти, да одесную Сына Твоего Бога предстанут; и молитвою Твоею сподоби вся православныя Христианы со Христом жити, и радости ангельския в небесных селениях наслаждатися. Ты бо еси, Госпоже, слава небесных, и упование земных. Ты наша надежда, и Заступница всех притекающих к Тебе, и Твоея святыя помощи просящих: Ты молебница наша теплая к Сыну Твоему и Богу нашему: Твоя матерняя молитва много может на умоление Владыки. Тем же всечестный образ Твой видяще, радуемся грешнии, со умилением припадающе, и любовию сей целуем, чающе, Госпоже, Твоими святыми Богоприятными молитвами доити небесныя бесконечныя жизни, и непостыдно стати в день судный одесную Сына Твоего и Бога нашего, славяще Его купно со безначальным Отцем, и пресвятым, благим, животворящим и единосущным Духом, во веки веков. Аминь.
18.
Благодарим Тя, о преблагая и пречистая, преблагословенная Дево Владычице, Мати Христа Бога нашего, о всех благодеяниях Твоих, яже показала еси роду человеческому, наипаче же нам Христоименитым людем Российскаго народа, о нихже ниже самый ангельский язык к похвалению доволен будет, яко же и ныне удивила еси неизреченную Свою милость на нас недостойных рабех Твоих, преестественным прославлением пречистыя Твоея иконы, ею же всю просветила еси Российскую страну: темже и мы грешнии со страхом и радостию поклоняющеся вопием Ти: о пресвятая Дево, царице и Богородице, спаси и помилуй Благочестивейшаго, Самодержавнейшаго, Великаго Государя нашего Императора Николая Александровича всея России, и Супругу Его Благочестивейшую Государыню Императрицу Александру Феодоровну и Матерь Его Благочестивейшую Государыню Императрицу Марию Феодоровну и наследника Его Благовернаго Государя Цесаревича и Великаго Князя Алексия Николаевича и весь Царствующий Дом: Святейший Правительствующий Синод, архиереи же и вся люди, и подаждь им победы на вся враги их, и сохрани царствующие грады, и вся грады, веси и страны христианския от всякаго навета вражия избави, и всем вся на пользу даруй, ныне пришедшим с верою, и молящимся рабом Твоим, и поклоняющимся пресвятому образу Твоему, яко благословенна еси с рождшимся от Тебе Сыном и Богом, ныне и присно и во веки веков.
Аминь.
19.
О всепетая Богообрадованная Мати, рождшая на радость небу и земли Царя Христа, Бога нашего: услыши глас скорбящих раб Твоих, и приемши сие малое моление наше, избави нас от всяких бед, скорбей и напастей: недуги наша исцели, напрасныя клеветы потреби, всяку злобу и вражду отжени от нас, и будущия изми муки, яко всемощная Заступница рода христианского. Аминь.
Пресвятая Богородице, спаси нас!
|
|
|
